ఎన్టీఆర్ బర్త్‌డే.. అర్ధరాత్రి తార‌క్‌ ఇంటి వద్ద జనసంద్రం.. అభిమానుల సంబరాలు వేరే లెవెల్!

యంగ్ టైగర్ ఎన్టీఆర్ పుట్టినరోజు వేడుకలు అంబరాన్నంటాయి. అటు అభిమానుల కోలాహలం, ఇటు కొత్త సినిమా అప్డేట్‌తో సోషల్ మీడియా హోరెత్తుతోంది. మే 19 అర్ధరాత్రి 12 గంటలు దాటగానే హైదరాబాద్‌లోని ఆయన నివాసం వద్ద సందడి వాతావరణం నెలకొంది. తమ అభిమాన నటుడికి పుట్టినరోజు శుభాకాంక్షలు తెలిపేందుకు తెలుగు రాష్ట్రాల నలుమూలల నుంచి వేలాదిగా అభిమానులు తరలివచ్చారు.

‘జై ఎన్టీఆర్’ అంటూ నినాదాలు చేస్తూ, బాణసంచా కాలుస్తూ పండగ వాతావరణాన్ని సృష్టించారు. అభిమానుల ప్రేమకు స్పందించిన తారక్, ఇంటి బయటకు వచ్చి అభివాదం చేస్తూ వారికి ధన్యవాదాలు తెలిపారు. ఈ దృశ్యాలకు సంబంధించిన వీడియోలు ప్రస్తుతం ఇంటర్నెట్‌లో వైరల్ అవుతున్నాయి.

‘డ్రాగన్’గా ఎన్టీఆర్ మాస్ అవతారం! 
మరోవైపు ఎన్టీఆర్ అభిమానులకు బర్త్‌డే కానుకగా ఆయన నటిస్తున్న ‘డ్రాగన్’ చిత్రం నుంచి పవర్‌ఫుల్ గ్లింప్స్ విడుదలైంది. ప్రశాంత్ నీల్ దర్శకత్వంలో మైత్రీ మూవీ మేకర్స్ నిర్మిస్తున్న ఈ సినిమా గ్లింప్స్‌లో ఎన్టీఆర్ సరికొత్త మాస్ అవతారంలో కనిపించారు. గణనీయంగా బరువు తగ్గి, రగ్గడ్ గడ్డం, వైల్డ్ హెయిర్ స్టైల్‌తో ఆయన లుక్ ఆకట్టుకుంటోంది. దాదాపు 4 నిమిషాల నిడివి గల ఈ వీడియోలో ఎన్టీఆర్ చెప్పిన పవర్‌ఫుల్ డైలాగ్, రవి బస్రూర్ సంగీతం ప్రధాన ఆకర్షణగా నిలిచాయి. ఈ గ్లింప్స్ విడుదలైన కొద్ది క్షణాల్లోనే ట్రెండింగ్‌లోకి వచ్చింది.